ორივენიცა
მაინცა, მაინცა? ორივენიცა! არც უნდა იყოს გასაკვირი, რომ ფეხბურთის ქართველ ქომაგს არჩევანის გაკეთება არ უნდა და ევროტურნირებს შემორჩენილი ორივე ჩვენებური კლუბის მატჩების ხილვა სურს.როგორც ცნობილია, ევროპის ლიგის ფლეი-ოფის პირველ შეხვედრებს თბილისის "დინამოც" და "ზესტაფონიც" 18 აგვისტოს ატარებენ, იმერული კლუბი - თბილისში, "დინამო" - ათენში. პრობლემა სწორედ ის იყო, რომ ორივე ქართული გუნდი ერთ დღეს თამაშობს, თუმცა, შეხვედრების დაწყების დრომ გულშემატკივრებს შვებით ამოსუნთქვის შესაძლებლობა მისცა - "ზესტაფონი"-"ბრიუგეს" მატჩი ეროვნულ სტადიონზე 20.30 საათზე დაიწყება, სტადიონიდან შინ მისულ თბილისელებს კი 22.45 საათზე "აეკისა" და "დინამოს" რეპორტაჟის ხილვა შეეძლებათ. ორივე ამ მატჩის რეპორტაჟს "საზოგადოებრივი მაუწყებელი" გადასცემს.