"ქმარს ხელი შევუბრუნე და საწოლზე გამოვაბი"
01-06-2015
"ქმარს ხელი შევუბრუნე და საწოლზე გამოვაბი"
მინდა იმ ქალებს მივმართო, ვინც ჯერჯერობით მოძალადე ქმრებს უძლებენ, - მითხრა ქალბატონმა მარინემ, - სამწუხაროდ, როდესაც ცოლი ქმრის მსხვერპლი ხდება, ხშირად სწორედ ქალები არიან დამნაშავენი.

მარინე ქ.: - ბოლო დროს ცოლების­ მკვლელობის მომრავლებამ ამომაღებინა­ ხმა. სამწუხაროდ, ცოლები მოძალადე ქმრებს ვერ შორდებიან და არაფერს აკეთ­ებენ იმისთვის, რომ საქმე საბედისწერო დასასრულამდე არ მივიდეს. რამდენიმე მაგალითს გეტყვით და თვითონ განსაჯეთ.
მე და ჩემი ქმარი სიყვარულით დავ­ქორწინდით. როდესაც ცხოვრება გაჭირდა და უსამსახუროდ დარჩა, აღარ
იცოდა,­ როგორ ერჩინა ოჯახი და გალოთდა. თავ­ისი სისუსტე აწუხებდა და მთვრალი ცდილ­ო­ბდა ბოღმა ვინმეზე დაენთხია. ასეთი განტევების ვაცი აღმოვჩნდი მე. ზუსტად ერთი თვე ვითმინე. ერთ დღესაც ხელი რომ მომიქნია, მეც მოვუქნიე. ძირს რომ გაიშხლართა, ვიხელთე დრო და საწოლზე გამოვაბი, სანამ არ გამოფხიზლდა. მერე კი ვუთხარი,
იმ კაცის გვერდით ვერ ვიცხოვრებ, რომ­ელმაც საცემრად გამიმეტა-მეთქი.

- წამოხვედით სახლიდან?
- არა. პოლიცია გამოვიძახე. ხელწერილი დააწერინეს, რომ სანამ სასამართლო გაგვყრიდა, შეეძლო, ჩვენ გვერდით ეცხოვრა, მაგრამ თუ დათვრებოდა, პოლიციას გამოვიძახებდი. მაშინ იმედი მქონდა, ეს ხელწერილი გამოაფხიზლებდა. ამაოდ... კიდევ­ დათვრა და კვლავ ცემა დამიპირა. ისევ პოლიცია ჩავრიე. შემდეგ გაყრის პროცესი­ დაჩქარდა. ჩემს ქმარს სოფელში ჰქონდა მამისეული სახლი. მოვითხოვე, რომ ის სახლი ჩვენთვის გადმოეცა. მოგვცა. კარგი სოფელია, მიწები გვაქვს, ბავშვები შრომას მივაჩვიე, მეურნეობა გავმართე. ჩემს ნაქმარევს სოფელში ჩასვლა აუკრძალეს თანასოფლელებმა - ლოთი არ გვჭირდებიო.

- ამ ამბით რისი თქმა გინდათ?
- იმის, რომ ქალები მოძალადე ქმრებთან რჩებიან იმიტომ, რომ არ შეუძლიათ დამოუკიდებლად ცხოვრება და არც კანონ­ისგან ითხოვენ დახმარებას. მეტიც. სოფელში ძალიან ხშირია ოჯახური ძალადობა.­ ერთხელ ცოლს ისე სცემა ქმარმა, რომ ხერხემალი დაუზიანა, მან კი ექიმს უთხრა, ხიდან ჩამოვვარდიო. ექიმი მიხვდა, რომ იტყუებოდა, მაგრამ ქალმა მაინც არ უჩივლა ქმარს. კაცმა კი ცოტა ხნის მერე გარეთ­ გააგდო დაინვალიდებული დედაკაცი და სხვა ქალი შეირთო. უამრავი მსგავსი ფაქტი ვიცი.

ალბათ, თქვენც გსმენიათ ასეთი სისულელე: კაცია და გაბრაზდება, კაცია და დალევს, კაცია და ქალისკენ გაიხედავს, კაცია და გიყვირებს, კაცია და ა.შ. ეს საშინელი სტერეოტიპული აზროვნება სპობს არა მხოლოდ ქალის ცხოვრებას, შვილებსაც უმრუდებს მომავალს. ასეთ გარემოში გაზრდილი ვაჟები ფიქრობენ, რომ ისინიც ისევე უნდა მოექცნენ ცოლებს, როგორც მათი მამები. გოგონებს კი მიაჩნიათ, რომ მათაც ისევე უნდა მოითმინონ, როგორც მათი დედები ითმენენ.

გამოფხიზლდით, ქალებო, თქვენ უნდა იბრძოლოთ თქვენი ცხოვრებისთვის, თორემ როდესაც კაცი მხეცდება, მის მოქნეულ ხელს ვეღარაფერი აჩერებს, შვილის ტკივილით და ცრემლით სავსე თვალებიც კი.

სოფო გამრეკელი
ნამ
22 მაისი 2017 10:00
მონური სულის ქალები ითმენენ თორემ როდის იყო კუზიანს სამარე ასწორებდა
ირინა
21 დეკემბერი 2016 03:44
ჩემი აზრით,ქალმა საკუთარ თავს უნდა სცეს პატივი,და გარშემო მყოფნიც პატივისცემით მოეპყრობიან,რას ქვია წასასვლელი არა აქვთ,დღესდღეისობით ქალების 90% ინახავს ოჯახს,კაცები?კაცები რას აკეთებენ?ბევრს მუშაობა ეთაკილება,ბევრს სამუშაო არ აქვს,დგანან ბირჟებზე და ერთობიან.საწყალი ქალები სამსახურს მორჩებიან,სახლში მივლენ,დაალაგებენ,დარეცხავენ,სადილს მოამზადებენ,ამასობაში მოვა ქმარი სახლში,ლუდის ბოთლით ხელში,რამე არ მოეწონა და დაბეგვავს გალანძღავს ცოლს,იმ ცოლს რომელიც ინახავს,სიგარეტის ფულს აძლევს,საჭმელს აჭმევს,არაფერს აკლებს ქმარს,ის ხომ ქმარია,პატივი უნდა სცეს,მაგრამ სწორედ იმ ქმარს ავიწყდება რომ ცოლი და შვილები ყავს შესანახი.და არავინ თქვას წასასვლელი არ გვაქვს და სწორედ მაგიტომ ვიტანთ შეურაწყოფასო!
21 დეკემბერი 2016 01:08
სრულიად გეთანხმებით,ამ სტერეოტიპებით არავინ არ უნდა დაიმახინჯოს ცხოვრება,ყველა ერთხელ მოდის ამქვეყნად და ყველა ადამიანია,ყველას ერთნაირი უფლება აქვს იცხოვროს როგორც სურს და არა როგორც მოძალადე გადაწყვეტს,ქალებო ნუ გაინადგურებთსიცოცხლეს და ჯანმრთელობას იმის გამო რომ ოჯახი არ დაანგროიოთ,ან ბავშვებს მამა ყავდეთ,თავს გაუფრთხილდით და იყავით ბედნიერები

რედაქტორის რჩევით